Boðskapur Biblíunnar er til heilla fyrir þann sem meðtekur. Þar af leiðandi er starf Lindarinnar til heilla fyrir land og þjóð.

Nú færum við þær fréttir að Lindin er komin á almannaheillaskrá yfirvalda. Þetta þýðir að nú fá einstaklingar og fyrirtæki sem styðja Lindina, skattalækkun, skv. nýjum lögum frá Alþingi.

Heildarupphæðin sem þú styrkir Lindina um á hverju almanaksári kemur sjálfkrafa árituð á skattframtalið.  Nýju lögin gilda frá 1. nóv. 2021, þannig að þeir sem styrktu Lindina með framlagi í nóv. og des. síðastliðnum ná að nýta skattalækkunina þá tvo mánuði líka, sem og allt þetta ár og næstu ár.

Einstaklingar

Frádráttur einstaklinga getur verið á bilinu 10 – 350 þkr. á hverju almanaksári. Hjá hjónum og sambúðarfólki getur hann numið að hámarki 700 þkr. og kemur til lækkunar á útsvars- og tekjuskattsstofni. Þetta þýðir að einstaklingur sem er í 38% skattþrepi og styður Lindina um 100.000 kr. á ári, fær þannig skattaafslátt upp á 38.000 kr. Það munar um minna.

Fyrirtæki

Frádráttur rekstraraðila getur numið 1,5% af rekstrartekjum ársins. Þetta þýðir að þar sem skattprósenta fyrirtækja er 20% og við tökum dæmi um fyrirtæki sem styður Lindina um 1 mkr á ári, þá fær fyrirtækið skattaafslátt upp á 200.000 kr.

Hér eftir mun Lindin skila framlagi allra gefenda til Skattsins sem áritar það á framtalið.

Við hvetjum þig, hlustandi góður, til að styðja hugsjónastarf Lindarinnar og nýta þér á sama tíma þennan skattaafslátt. Komdu í mánaðarlegan stuðning eða hækkaðu núverandi stuðning þinn til Lindarinnar. Það hjálpar Lindinni og lækkar skattana þína á sama tíma.  Við minnum líka á afmælisviku Lindarinnar í byrjun mars. Þá verður Lindin 27 ára og þá einblínum við, að venju, á rekstrarþörfina og öflum fjár fyrir árið.

Kærleikskveðja,

Hafsteinn Gautur Einarsson, útvarpsstjóri